[:en]

श्री व्हि.एम.लाकडे जिल्हा व्यवसाय शिक्षण व प्रशिक्षण अधिकारी, भंडारा.

  आपल्या देशाचा सर्वांगीण विकास हा केवळ शैक्षणिक प्रगतीने नव्हे तर कौशल्याधारित शिक्षणामुळेही घडतो. व्यवसाय शिक्षण व प्रशिक्षणाच्या माध्यमातून युवकांना स्वावलंबी बनवणे, उद्योगधंद्यांमध्ये सक्षम भूमिका बजावण्यास तयार करणे तसेच  आजच्या स्पर्धात्मक युगात गुणवत्तापूर्ण व्यवसाय शिक्षण व प्रशिक्षणाचे महत्त्व दिवसेंदिवस वाढत आहे. आपल्या जिल्ह्यातील युवकांना योग्य मार्गदर्शन, आधुनिक तंत्रज्ञानाची ओळख व उद्योगधंद्याशी सुसंगत कौशल्ये प्राप्त करून देणे हेच आमचे मुख्य उद्दिष्ट आहे.   व्यवसाय शिक्षण हे केवळ पुस्तकी ज्ञानापुरते मर्यादित न ठेवता, प्रत्यक्ष जीवनात वापरता येईल अशा प्रकारच्या व्यावसायिक कौशल्यांचा विकास करणे आवश्यक आहे. आजच्या डिजिटल युगात केवळ प्रमाणपत्र असून चालत नाही, तर त्यामागे असलेली कौशल्ये, अनुभव आणि तंत्रज्ञानाची जाण आवश्यक आहे. म्हणूनच व्यवसाय शिक्षण हे ‘ज्ञान’ आणि ‘कौशल्य’ यांचा सुरेख संगम असतो. आमच्या विभागातर्फे प्रत्येक प्रशिक्षणार्थ्याला रोजगारक्षम, उद्योगक्षम आणि जबाबदार नागरिक बनवण्यासाठी आम्ही सातत्याने प्रयत्नशील आहोत.   सरकारच्या विविध योजना – जसे की कौशल्य विकास अभियान, अप्रेंटिसशिप योजना, प्रधानमंत्री कौशल्य विकास योजना – यांचा लाभ विद्यार्थ्यांपर्यंत पोहोचवण्यासाठी आम्ही वचनबद्ध आहोत. याशिवाय, स्थानिक उद्योगांशी भागीदारी करून कार्यानुभव, औद्योगिक भेटी, वर्कशॉप्स आणि प्रशिक्षण शिबिरे यांचे आयोजन नियमितपणे केले जाते.   माझ्या सर्व प्रशिक्षणार्थींना सांगू इच्छितो की, विद्यार्थ्यांनी व्यवसाय शिक्षणाकडे केवळ पर्याय म्हणून न पाहता, एक उज्वल करिअरची संधी म्हणून बघावे. कौशल्याधिष्ठित शिक्षण हे केवळ नोकरी मिळवण्यासाठी नाही, तर स्वयंरोजगाराच्या संधींसाठीदेखील मार्गदर्शक ठरते. तसेच तुम्ही मिळालेल्या संधींचा पूर्ण उपयोग करा. शिकण्याची उर्मी आणि मेहनत घेत राहिल्यास तुम्ही नक्कीच यशस्वी व्हाल. आत्मनिर्भर भारताचे स्वप्न साकार करायचे असल्यास, आपण सर्वांनी व्यवसाय शिक्षणाचा स्वीकार करून समाजहितासाठी योगदान द्यायला हवे.[:]